Prugrama di KASABELA es 4ª i 5ª Fera - 29 i 30 di Nuvembru

Nuvembru dja sta termina i nu sta fitxa mes di sinema ku mas 2 atividadi.

4ª Fera dia 29 - 19:30 nu sta bai odja:

"Bowling for Columbine" di Michael Moore

Debati sta ba ser konduzidu pa Rosinha!

5ª Fera dia 30 - 21:30 e dia di Tertulia i des bes tema e:

"Cinema Negro. Cinema de África e Américas"

Moderador e um apaixonadu pa sinema i si nomi e Kamilu.

Ok, nu ta konta ku nhos prezensa di tudu kenha ki gosta di sinema, ...i di papia.

KASABELA es 4ª i 5ª Fera - 22 i 23 di Nuvembru

4ª Fera dia 22 - 19:30 nu sta bai odja:

"Venus Boyz" di Gabriel Baur

5ª Fera dia 23 - 21:30 e dia di Tertulia i des bes tema e:

"SINEMA POBRI NA KABU VERDI"

Projectu ki ta kumesa es mesmu kinta fera na CCP di Praia, sta bai aprezentanu 2 filmi di RICARDO LEITE e ZENITO WEYL.

Dipos di filmi nu ta tem xansi di papia ku es sobri sinema pobri, di undi ke ben kel manera di fazi sinema i kal ke spritu di sinema pobri.

Na blog di projecto CINEMA POBRE EM CABO VERDE tem mas informason di sinema pobri na mundu i programasson pa prokectu ki ta kumesa es semana ki tem mostra di sinema i um ofisina pa kenha ki kre prendi fazi sinema.

Ok, nu ta konta ku nhos prezensa kritiku di tudu bes.

Tertulia KASABELA - SINEKLUBISMU - 16/11/06

Debati kumesa ku un pikenu introduson di Cesar pa fala di tertulias i poe tudu algen na mesmu spritu di konvivensia.

Nu kumesa pa fala ma tudu algen gosta di sinema, ma ka ten lugares na praia pa odja filmis o na sanvicenti pamo sinema dja ka fitxa.

Ten alguns kau ki ta da pa odja filmi, ma ten pokus atividadi tudu anu na praia. Nu podi fla ma tem es anu tevi Oía, filmis di CCF i es anu sta ben tem sinema pobri. Kela e poku na um anu nun sidadi ki tem mas di 100 mil habitanti.

Inda bem ki maltas ta djunta na kasa di amigus pa odja filmis si nou e kada kenha ku se dvd.

Bom notisia e novus realizadores na tera. Yuru, Mário Cabral i otus maltas dja sta ta fazi. Pes ka para! Pamo si nu djobi produson nasional di filmi sempri foi lebi, i dja stevi kuasi ta dezaparsi.

Bons notisia e pamo teni alguns organizason ta kre djuda fazi sinema na kabu verdi. Moda AfricaDoc ki ta djuda forma realizadores i ta djudas na produson.
Inton di tudu kela, ta da pa intendi ma sineklubi tem si valor na djuda labanta interessi i kultura di sinema na tudu si diversidadi pa inton nu podi pensa, kritika i fazi un sinema ki ten interessi nasional.
Inton debeti kumesa ku xis keston.

Pamo nu ka ten um sineklubi na Praia?
Ki tipu di sineklubi nu sta mesti?

Nu kemesa pa fala di Kafuka - Cineclube da Praia ki kumessa fazedu na fim di 2004 i dja na meiu 2005, sineklubi dja sta paradu.

Maltas kumesa pa fala di prublemas di fazi kusa dentu di um assosiason, undi atitudu di kabuverdianus ta leba kusa sempri pa konfuson i sempri kusas ta kaba. Tudu algen ta fika desmotivadu i nu ta kaba pa largal da mon i kumesa tudu di prinsipiu.

Kafuka, tinha um monti alguen ku gana fazi, inton montadu monti kusa pa fazi na um anu, monti di ideias i monti di responsabilidi na poku tempu. Nu fala ma Kafuka para talvez pamo e staba ta da passu mas grandi ki perna i nu sta ta pensa mas na organiza, di ki pensa na fazi kusas simplis.

Bom di la faladu mas di sineklubi, nu tevi bons partipason di maltas ki dja vivi speriensia di sineklubismu i es koloka vontadi di ten un sineklubi ta sta dentu di kada kual, undi pessoas mesti di um alternativa a kes sirkuitu di sinema kumersial inton es ta pusta na ranja filmis alternativu.

Nu papia txeu na kel keston di spritu di um sineklubi undi kes algen ki ta partisipa es ta buska otus kusa i inton ku un atitudi radikal es ta sai ta fazi kusas novu, moda kria spasu pa sunha, pensa i agi di otus manera.

Nu kestiona papel di pulitika i kal ke sis vison pa sinema (audiu-visual), dadu exemplu na brasil i otus kau undi djas intendi ma sineklubi podi partisipa na desenvolvimentu di kumunidadis na tudu kau.
Tevi otus algen ki txiga atrasadu ma mesmu asi es kis trazi sis kontribuison i nu tevi uns debati mas kenti, dja go sobri sinema i nos sosiedadi.

Pa fitxa fika uns desafiu interessanti moda jovens dexa di pensa radikal ma pes passa ta fazi kusas radikal, pa nu assumi nos realidadi i nu usal moda um instrumentu di fazi kusas i pa nu ba ta fazi pikinoti i nu ba ta kria ti nu ten kanela.

Bom min atxa ma debati ta inspira ma ka ta fitxa nada.

MODERADOR: TIDE

Tertulias na mes di Nuvembru

Mes di nuvembru e mes di sinema dukumental i na KASABELA nu sta dedikal a sinema.

Dia 2 nu tevi um sesson ku realizador di Sinema CÉSAR PAES ki fala di sis filmis, rializason di sinema dukumental i otus assuntu ligadu ku tema.

Dia 9 tevi otu sesson ki nu debati LEI DI MECENATU ku alguns sidadon ki ta intendi di assuntu i nos ki kria sabi mas.

Es semana nu sta kontinua ku sinema na KASABELA

4ª Fera - 19:30 * 15/11 - noti di sinema. Nu teni dos filmi pa skodji un.

Opson 1 - "Bowling for Columbine" di Michael Moore

Opson 2 - "Venus Boyz" di Gabriel Baur

5ª Fera - 21:30 * 16/11 - Tertulia. SINEKLUBISMU

Pa nu entra dja na debati nu sta dexa nhos ku un definison di Sineclubi i um enderesu di pundi nu tral.

Cineclube é uma entidade que estimula os seus membros a ver, discurtir e refletir sobre o cinema. O cineclubismo surgiu nos anos 20 do século XX.

Os cineclubes foram responsáveis pela formação cinematográfica de vários dos grande cineastas, dentre os quais pode-se destacar Glauber Rocha , Cacá Diegues, Jean-Luc Godard e Wim Wenders Fonte: WIKIPÉDIA